ತುಂಬಿತು ಎರಡು...

ಆತ್ಮೀಯ ಬಂಧುಗಳೇ ಹಾಗೂ ಸ್ನೇಹಿತರೇ ,

ಇಂದು ಫೆಬ್ರುವರಿ ೨೮ ..... ' ಮನಸೆಂಬ ಹುಚ್ಚು ಹೊಳೆ ' ಎಂಬ ಹೆಸರಿನ ಹುಚ್ಚು ಬ್ಲಾಗೊಂದು ಹುಟ್ಟಿಕೊಂಡ ದಿನ ! ಈ ಸಂದರ್ಭದಲ್ಲಿ ಈ ಬ್ಲಾಗಿನ ಪರವಾಗಿ ನಾನು ಎರಡು ಮಾತುಗಳನ್ನು ಆಡಬಯಸುತ್ತೇನೆ.

ನೋಡ ನೋಡುತ್ತಿದ್ದಂತೆ , ಎರಡು ವರ್ಷ ತುಂಬಿಯೇ ಬಿಟ್ಟಿತು ! ಇನ್ನೂ ಮುಂದುವರೆಯುತ್ತಿದ್ದೇನೆ ಅನ್ನೋದು ಒಂಥರಾ ಆರೋಗ್ಯಕರ ಬೆಳವಣಿಗೆ ಅನಿಸುತ್ತದೆ . ಈ ಚಿಕ್ಕ ಅವಧಿಯಲ್ಲಿ ಬಳಗ ಸುಮಾರು ಬೆಳೆದಿದೆ . ಕೆಲವು ಒಳ್ಳೆಯ ಸ್ನೇಹಿತರು ದೊರೆತಿದ್ದಾರೆ.ಅವರೊಂದಿಗೆ ವೈಯುಕ್ತಿಕವಾಗಿ ಹರಟುವಷ್ಟು , ಚರ್ಚೆ ಮಾಡುವಷ್ಟು , ಜಗಳವಾಡುವಷ್ಟು ಸಲುಗೆ ಬೆಳೆದಿದೆ. ಬೆನ್ನು ತಟ್ಟಿ ( ಕಾಮೆಂಟಿಸಿ) ಪ್ರೋತ್ಸಾಹಿಸುವವರ ಸಂಖ್ಯೆ ಹೆಚ್ಚುತ್ತಿದೆ. ಬರೆಯದೆ ಬಹುದಿನಗಳಾದಾಗ " ಯಾಕೆ ಬರೆದಿಲ್ಲ? " ಎಂದು ತಕರಾರು ಮಾಡುವವರೂ ಸಿಕ್ಕಿದ್ದಾರೆ .

ಹಿಂತಿರುಗಿ ನೋಡಿದಾಗ , 'ಸಾಧನೆ ಮಾಡಿದ್ದೇನೆ ' ಎಂದು ಬೆನ್ನು ತಟ್ಟಿ ಕೊಳ್ಳುವಂಥಾದ್ದು ಏನೂ ಕಾಣುತ್ತಿಲ್ಲ ನನ್ನ ಕಣ್ಣಿಗೆ. ಸುಮ್ಮನೆ ,ಮನಸಿಗೆ ಬಂದಿದ್ದನ್ನು, ತಲೆಗೆ ಹೊಳೆದಂತೆ , ಅಕ್ಷರಗಳಲ್ಲಿ ಮೂಡಿಸಿದ್ದೇನೆ. ಈಗ ಮೂರರ ಹೊಸಿಲಲ್ಲಿ ನಿಂತು ಅವನ್ನೆಲ್ಲ ಮತ್ತೊಮ್ಮೆ ಓದಿದಾಗ " ಛೆ, ಇದನ್ನು ಹೀಗೆ ಬರೆಯ ಬಹುದಿತ್ತು, ಇಲ್ಲಿ ಹಾಗೆ ಮಾಡಬಾರದಿತ್ತು, ಇದರಲ್ಲಿ ಇನ್ನಷ್ಟು ವಿವರಗಳನ್ನು / ವಿಷಯಗಳನ್ನು ಸೇರಿಸಬಹುದಿತ್ತು " ಎಂದೆಲ್ಲ ಅನಿಸುತ್ತದೆ. ಅದೆಷ್ಟೋ ಬರಹಗಳು ನನಗೇ ಬಾಲಿಶವೆನಿಸುತ್ತವೆ. ಅವುಗಳನ್ನು ಓದಿ ನೀವೇನು ಅಂದುಕೊಂಡಿರೋ ಎನಿಸಿ ಈಗ ಮುಜುಗರವಾಗುತ್ತದೆ. ಮುಂದೆ ಬರೆಯುವಾಗ ಇವನ್ನೆಲ್ಲ ಗಮನದಲ್ಲಿಟ್ಟುಕೊಳ್ಳಬೇಕು , ಸ್ವಲ್ಪ ಸೀರಿಯಸ್ ಆಗಿ ( ಸೀರಿಯಸ್ ವಿಷಯಗಳು ಎಂದಲ್ಲ! ) ಬರೆಯಬೇಕು ಎಂದುಕೊಳ್ಳುತ್ತೇನೆ . ಆದರೆ ನನಗೆ ಗೊತ್ತು ಮತ್ತೆ ಮುಂದಿನ ವರ್ಷವೂ ಇದು ಪುನರಾವರ್ತಿಸುತ್ತದೆ . ಅದು ಹಾಗೆಯೇ ಅಲ್ಲವೇ/ ಇಂದು ಅತೀ ಮುಖ್ಯವೆನಿಸಿದ್ದು ನಾಳೆಗೆ ಕ್ಷುಲ್ಲಕ ಎನಿಸಿಬಿಡುತ್ತವೆ.

ನಿಮಗೊಂದು ನಿಜ ಸಂಗತಿ ಹೇಳಬೇಕೆಂದರೆ , ಇತ್ತೀಚೆ ಬರವಣಿಗೆ ಸ್ವಲ್ಪ ಹಿಂದೆ ಬಿದ್ದಿದೆ. ಅದು ನನ್ನ ಸೋಮಾರಿತನಕ್ಕೋ ಅಥವಾ ವಿಷಯಗಳೇ ಹೊಳೆಯುತ್ತಿಲ್ಲವೋ ಅಥವಾ ವಿಷಯಗಳಿದ್ದರೂ ಬರೆಯಲು ತೋಚುತ್ತಿಲ್ಲವೋ ಅಥವಾ ಸಮಯಾಭಾವಕ್ಕೋ ಅನ್ನೋದು ನಾನೇ ಕಂಡುಹಿಡಿಯಬೇಕಷ್ಟೇ. ಈ ವರ್ಷವಾದರೂ ಹೆಚ್ಚು ಹೆಚ್ಚು ಬರೆಯಬೇಕು ಅಂತ ಸದ್ಯಕ್ಕಂತೂ ಯೋಚನೆ ಮಾಡುತ್ತಿದ್ದೇನೆ .. ನೋಡೋಣ !

ನನ್ನ ಮಾತುಗಳೇ ಹೆಚ್ಚಾದವು ಎನ್ನುತ್ತೀರಾ? ಸರಿ ಬೇಗ ಮುಗಿಸುವೆ. ಗಂಟೆಗಟ್ಟಲೆ ಕೊರೆಯಲು ನಾನಿನ್ನೂ ರಾಜಕೀಯಕ್ಕೆ ಸೇರಿಲ್ಲ ಬಿಡಿ!

ಮೇಲೆ ಬರೆದಂತೆ, ನನ್ನ ಬರಹಗಳನ್ನು ಓದುವವರ , ಆ ಮೂಲಕ ಪ್ರೋತ್ಸಾಹ ನೀಡುವವರ ಸಂಖ್ಯೆ ಹೆಚ್ಚಾಗಿದ್ದು ಖುಷಿ ಕೊಡುತ್ತಿದೆ. ಆದರೆ , ಅವರೆಲ್ಲರ ಬ್ಲಾಗ್ ಗಳಿಗೆ ರೆಗ್ಯುಲರ್ ಆಗಿ ಹೋಗಲು , ಹೋದಾಗೆಲ್ಲ ಒಂದು ಕಾಮೆಂಟ್ ಹಾಕಲು ಎಷ್ಟೋ ಸಲ ಸಾಧ್ಯವಾಗುತ್ತಿಲ್ಲ ಎನ್ನುವ ಬೇಸರವೂ ಇದೆ. ದಯವಿಟ್ಟು ಈ ವಿಷಯವಾಗಿ ತಪ್ಪು ತಿಳಿಯಬೇಡಿ ಎಂದು ವಿನಂತಿಸುವೆ.

ಹಾಂ , ಬ್ಲಾಗ್ ನ ತಾಯಿ ನಾನಾದರೂ , ಇದನ್ನು ಬೆಳೆಸುವ , ಪ್ರೋತ್ಸಾಹದ ನೀರೆರೆದು ಪೋಷಿಸುವ ಕೆಲಸವನ್ನು ನೀವೆಲ್ಲರೂ ನನ್ನೊಡನೆ ಹಂಚಿಕೊಂಡಿದ್ದಕ್ಕೆ ನಿಮಗೆಲ್ಲರಿಗೂ ನಾನು ಆಭಾರಿಯಾಗಿದ್ದೇನೆ . ನಿಮ್ಮೆಲ್ಲರ ಆಶೀರ್ವಾದ, ಪ್ರೋತ್ಸಾಹ , ಪ್ರೀತಿ, ಅಭಿಮಾನಗಳು ಈ " ಹುಚ್ಚು ಹೊಳೆ " ಯ ಜೊತೆ ಸದಾ ಇರಲಿ ಎಂದು ಕೇಳಿಕೊಳ್ಳುತ್ತಾ ನನ್ನ ಎರಡು ಮಾತುಗಳನ್ನು ಮುಗಿಸುತ್ತೇನೆ .

ನಮಸ್ಕಾರ,

ಜೈ ಹಿಂದ್ !