ಸಂಸ್ಕೃತಿ ರಕ್ಷಣೆಯ ಹೆಸರಿನಲ್ಲಿ !!

ಮೊನ್ನೆ ಮಂಗಳೂರಿನಲ್ಲಿ ನಡೆದ ಘಟನೆಯನ್ನು ಟಿವಿಯಲ್ಲಿ ನೋಡಿದಾಗ ಮೈಯೆಲ್ಲಾ ಉರಿದೇ ಹೋಯ್ತು !

ಇವರಿಗೆ ಸಂಸ್ಕೃತಿಯ ಬಗ್ಗೆ ಅಷ್ಟು ಕಾಳಜಿ ಇದ್ದರೆ , ಆ ಹೆಣ್ಣುಮಕ್ಕಳ ಪಾಲಕರಿಗೆ ತಿಳಿಸಬಹುದಾಗಿತ್ತಲ್ಲ ? ತಾವೇ ಸ್ವತ: ಅವರ ಮೇಲೆ ಕೈ ಮಾಡುವ ಹಕ್ಕು ಅವರಿಗ್ಯಾರು ಕೊಟ್ಟಿದ್ದು ? ಇದ್ಯಾವ ಬಗೆಯ ಸಂಸ್ಕೃತಿ ರಕ್ಷಣೆ ? ಅಲ್ಲದೇ ಸಂಸ್ಕೃತಿ ರಕ್ಷಣೆಯ ಭಾರ ಕೇವಲ ಮಹಿಳೆಯರ ಮೇಲಿದೆಯೆ? ಪುರುಷರು ಏನು ಬೇಕಾದರೂ ಮಾಡಬಹುದೆ ?

ತಾವು ಹೆಣ್ಣು ಮಕ್ಕಳನ್ನು ರಕ್ಷಿಸುತ್ತೇವೆಂದು ಘೋಷಿಸುವ ಇವರು ಮಾಡಿದ್ದಾದರೂ ಏನು ? ಹೆಣ್ಣು ಮಕ್ಕಳ ಮೇಲೆ ಕೈ ಮಾಡಿದ್ದು ಯಾವ ಸಂಸ್ಕೃತಿ?

ವರದಕ್ಷಿಣೆಗಾಗಿ ಹೆಣ್ಣುಮಕ್ಕಳನ್ನು ಕೊಲ್ಲುವುದು, ಪುಟ್ಟ ಪುಟ್ಟ ಬಾಲಕಿಯರಿಂದ ಹಿಡಿದು ವಯಸ್ಸಾದ ಮಹಿಳೆಯರನ್ನೂ ಸಹ ತಮ್ಮ ಕಾಮತೃಷೆಗೆ ಬಲಿಪಶುಗಳನ್ನಾಗಿಸುವುದು ,ಜನಸಂದಣಿಯಲ್ಲಿ ಹೆಣ್ಣುಮಕ್ಕಳ ಮೈ-ಕೈ ಸವರಿ ವಿಕೃತ ತೃಪ್ತಿ ಹೊಂದುವುದು , ಇವೆಲ್ಲ ನಮ್ಮ ಸಂಸ್ಕೃತಿಯೆ? ಇಂಥ ಪ್ರತಿನಿತ್ಯ ನಡೆಯುವ ಘಟನೆಗಳನ್ನು ವಿರೋಧಿಸುವರೆ ಇವರು? ಹೋಗಲಿ , ಮೊನ್ನೆಯ ಘಟನೆ ಸಮಯದಲ್ಲೇ ಹೆಣ್ಣುಮಕ್ಕಳ ಮೈಕೈ ಸವರಿದರಲ್ಲ ಇದು ಇವರ ಸಂಸ್ಕೃತಿಯೆ? ಆ ನಂತರವೂ ಸಹ , ಈ ಹೆಣ್ಣು ಮಕ್ಕಳೆಲ್ಲ ತಮ್ಮ ಸೋದರಿಯರಂತೆ ಎಂದು ಯಾವ ಬಾಯಿಂದ ಹೇಳಿಕೆ ಕೊಡುತ್ತಾರೆ ಇವರು? ಸೋದರಿಯರ ಜೊತೆ ವರ್ತಿಸುವ ರೀತಿಯೇ ಇದು? ಇಂಥ ಪ್ರತಿಭಟನೆಗಳಲ್ಲಿ ಈ ರೀತಿಯ ವರ್ತನೆ ಸ್ವಾಭಾವಿಕ ಎಂಬಂಥ ನಾಚಿಕೆಗೆಟ್ಟ ಹೇಳಿಕೆ ಬೇರೆ !

ಇವತ್ತಿನ ಪರಿಸ್ಥಿತಿಯಲ್ಲಿ ನಾವು ಮಹಿಳೆಯರು ಸೀತಾಮಾತೆಯಾಗಿ ಮೌನವಾಗಿ ಎಲ್ಲವನ್ನೂ ಸಹಿಸುವುದು ಸಾಧ್ಯವಿಲ್ಲ . ಅದಕ್ಕಿಂತ ದಿಟ್ಟ ದ್ರೌಪದಿ ಮೆಚ್ಚುಗೆಯಾಗುತ್ತಾಳೆ. ದುಷ್ಟರನ್ನು ಶಿಕ್ಷಿಸುವ ದುರ್ಗಾಮಾತೆ ಹೆಚ್ಚು ಪ್ರೀತಿಯಾಗುತ್ತಾಳೆ ! ಸೀತೆಯಷ್ಟೇ ಅಲ್ಲ , ದ್ರೌಪದಿ, ದುರ್ಗಿಯರೂ ನಮ್ಮ ಸಂಸ್ಕೃತಿಯ ಭಾಗವೆಂಬುದು ಇವರಿಗೆ ನೆನಪಿರಲಿ !

ನನಗೆ ಬೇಜಾರಾಗಿದ್ದೆಂದರೆ, ಮೀಡಿಯಾದವರೂ ಸಹ , ತಮಗೆ ಸಿಕ್ಕ ಮಾಹಿತಿಯನ್ನು ಪೋಲೀಸರಿಗೆ ಮುಂಚಿತವಾಗಿ ತಿಳಿಸಿದ್ದರೆ ಘಟನೆಯನ್ನು ತಡೆಯಬಹುದಾಗಿತ್ತೇನೋ! ಪ್ರಕರಣವನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿಯುವ ಬದಲು ಅತ್ಯಾಚಾರಿಗಳನ್ನು ಸ್ವಲ್ಪ ಮಟ್ಟಿಗಾದರೂ ತಡೆಯುವ ಪ್ರಯತ್ನ ಮಾಡಬಹುದಿತ್ತಲ್ಲ?

ನಮ್ಮಲ್ಲಿಯೇ ಇಂಥ ಘಟನೆಗಳು ನಡೆಯುವಾಗ , ತಾಲಿಬಾನ್ ಅನ್ನು ಖಂಡಿಸುವ ಹಕ್ಕು ನಮಗಿದೆಯೆ ?

ಇಂಥ ’ ಸಂಸ್ಕೃತಿ ರಕ್ಷಕ’ ರಿಗೆ ನನ್ನ ಧಿಕ್ಕಾರವಿದೆ !